Преподобный Лукиан Александровский.
Память: 9 (22) сентября и в Неделю 6-ю по Пасхе, о слепом.
Тропарь, глас 8.
От ю́ности зо́ву Бо́жию после́довал еси ре́вностно,/ мона́шескую стезю́ во спасение я́ко кре́ст Госпо́день избра́вый,/ благода́ть Христо́ву мно́гим терпе́нием оби́льно восприя́в,/ оби́тели и́ночествующих прему́дро устроя́л еси́,/ подая́й все́м смире́нный о́браз своего́ жития́./ Те́мже усе́рдно с любо́вию мо́лим тя:/преподо́бне о́тче наш Лукиа́не,/ пу́стынь твою́ и гра́д Алекса́ндров // сохрани́ от вся́каго зла и спаси́ нас.
Кондак, глас 8.
Я́ко строи́тель мно́гих святы́х оби́телей был еси́,/ препо́добне о́тче наш Лукиа́не,/ ду́шу свою́ и ду́ши ве́рных тебе́ в небе́сный черто́г в трудах созида́я,/ иде́же в сла́дости Пресве́тлаго Жениха́ Христа́ обре́л еси́,/ неизрече́нныя ми́лости Его ми́ру приле́жно прославля́я,// непреста́нно со а́нгелами поя́ ди́вную пе́снь: Аллилу́иа.
Молитва.
О блаже́нне о́тче Лукиа́не, свети́льниче ве́ры, доброде́телей и́стинный учи́телю, тружда́ющихся и обремене́нных святы́й о́браз, в терпе́нии сто́лпе кре́пкий, во благоче́стии река́ неистощи́мая, стра́сти плотски́я удобь до конца́ му́жески попра́, бесо́вския вся ко́зни до́блественне победи́, а́нгелом при́сный собесе́дниче, я́ко безпло́тен на земли́ пожи́л еси́. И ны́не дерзнове́нно предстоя́ Престо́лу Небе́снаго Царя́, Его́же обстоя́т безпло́тнии си́лы, побе́дную пе́снь с ни́ми Ему возсылае́ши со все́ми святы́ми, в ра́дости зря вы́шнюю и неизрече́нную красоту́ жи́зни ве́чныя. Мо́лим тя, подви́жниче наш до́брый, упаси́ и спаси́ лю́ди твоя́, моли́твами и моле́нием твои́м, те́плым твои́м предста́тельством пред Пречи́стым и Всеми́лостивым Спа́сом, от всех собла́знов ми́ра сего́, от вражды́ и свар, в зе́млех на́ших царя́щия, от раско́ла и ересе́й, гордо́стию от Це́ркви отходя́щия, наставля́я презира́ти по́хоть пло́ти, прехо́дит бо. Насади́ и умно́жи в нас ве́ру Христо́ву, да еди́ни бу́дем душе́ю, я́ко ка́мень краеуго́льный, на не́мже Це́рковь Свою́ Христо́с зи́ждет ве́чно, разруша́я тверды́ни вся́кия а́да. На́стави нас к покая́нию и смире́нию души́, я́ко веще́й безсме́ртных, да сподо́бимся мно́гих ми́лостей Бо́жиих, Ду́ха Госпо́дня, ходя́ще во обновле́нии ума́ и усе́рдно творя́ще пове́ления Христа́ Бо́га на́шего, жи́знь небе́сную восприи́мем пре́жде сме́рти зде́, наипа́че та́мо, в Оте́честве Боже́ственнем и свя́тем, безконе́чно прославля́я в нем вку́пе с тобо́ю Жизнода́вца Бо́га, в Тро́ице поклоня́емаго Отца, и Сына, и Свята́го Духа. Аминь.
Приложения:
Служба прп. Лукиану сентября в день 9-й.
Преподобный Корнилий Александровский.
Память: 11 (24) августа и в Неделю 6-ю по Пасхе, о слепом.
Тропарь, глас 2.
Имже о́бразом жела́ет еле́нь/ на исто́чники водны́я,/ си́це возже́ла душа́ твоя́ от ю́ности к Бо́гу./ Трудо́м и моли́твою житию́ святы́х оте́ц поревнова́л еси́,/ Бо́жиим изволе́нием и моли́твами Пресвяты́я Богоро́дицы/ земли́ Алекса́ндровския свети́льник пока́зался еси́/ и ма́лое ста́до Христо́вых ове́ц до́бре упасл еси́./ Сопричти́ и нас Бо́гом собра́нному твоему́ ста́ду,/ почита́ющих любо́вию святу́ю па́мять твою́,// Корни́лие преподо́бне о́тче наш.
Кондак, глас 4.
За́поведи Христо́вы усе́рдно испо́лнив,/ па́стырства благода́ть насле́довал еси́,/ боле́́знуя се́́рдцем о всех,/ с ве́́рою притека́ющих к тебе,/ и́ноков собира́тель, Корни́лие преподо́бне./ Те́мже и мы, ча́да твоя́́,/ с любо́́вию вопие́́м ти:/ со учи́́телем твои́м преподо́бным Лукиа́ном // моли́ Христа́ Бо́га спасти́ся душа́м на́шим.
Молитва.
О свяще́нная главо́, препо́добне и бого́носне о́тче наш Корни́лие! Ты, всеусе́рдно порабо́тати Го́сподеви жела́я, в земли́ Алекса́ндровстей всели́лся еси́, оби́тели, осно́ванныя преподо́бным Лукиа́ном, до́бре устроя́я. Неле́ностно в труде́х, бде́ниих, моли́твах и посте́х подвиза́яся, бесо́вския ко́зни му́жески попра́вше, был еси́ наста́вник мона́хом, все́м же лю́дем учи́тель ре́вностный и оте́ц чадолюби́вый. Ны́не у́бо, по отше́ствии твое́м от земны́х, Небе́сному Царю́ предстоя́, моли́ святы́я оби́тели твоя́, иде́же ду́хом любве́ твоея́ неотсту́пно пребыва́еши, и всем лю́дем, с ве́рою к моще́м твои́м приходя́щим, во блага́я проше́ния их испо́лнити. Испроси́ у Великодарови́таго Бо́га на́шего, да сохрани́т Святу́ю Це́рковь непозы́блему от ересе́й и раско́лов, Оте́честву на́шему мир и тишин́у да да́рует, нам же да продли́т вре́мя на покая́ние и исправле́ние жития́. Утверди́ нас в соблюде́нии Христо́вых за́поведей, да та́ко зде богоуго́дно пожи́вше, сподо́бимся безпреткнове́нно вни́ти в ве́чное Небе́сное Ца́рство, иде́же ты со учи́телем твои́м преподо́бным Лукиа́ном и все́ми святы́ми непреста́нно прославля́еши Отца́ и Сы́на и Свята́го Ду́ха во ве́ки веко́в. Ами́нь.
Приложения:
Служба прп. Корнилию августа в день 11-й.
Икона «Рождества Богородицы» Лукиановская.
День празднования: 8 (21) сентября.
Тропарь, глас 4.
Рождество́ Твое́, Богоро́дице Де́во,/ ра́дость возвести́ все́й вселе́нней:/ из Тебе́ бо возсия́ Со́лнце пра́вды Христо́с Бог наш,/ и разруши́в кля́тву, даде́ благослове́ние,// и упраздни́в сме́рть, дарова́ нам живо́т ве́чный.
Кондак, глас 4.
Иоаки́м и Анна поноше́ния безча́дства,/ и Ада́м и Ева от тли сме́ртныя свободи́стася, Пречи́стая,/ во святе́м рождестве́ Твое́м./ То пра́зднуют и лю́дие Твои́,/ вины прегреше́ний изба́вльшеся,/ внегда́ зва́ти Ти:// непло́ды ражда́ет Богоро́дицу и пита́тельницу жи́зни на́шея.
Молитва.
О, Пресвята́я Влады́чице Богоро́дице, Цари́це небесе́ и земли́, вы́сшая а́нгел и арха́нгел и всея́ тва́ри честне́йшая, чи́стая Де́во Мари́е, ми́ру блага́я помо́щнице и утвержде́ние и всем во вся́ких ну́ждах избавле́ние! При́зри и ны́не, Госпоже́ всеми́лостивая, на рабы́ Твоя́, умиле́нною душе́ю и сокруше́нным се́рдцем Тебе́ моля́щияся, и со слеза́ми к Тебе́ припа́дающия, и пречи́стому и цельбоно́сному о́бразу Твоему́ покланя́ющияся, Твоея́ же по́мощи и заступле́ния во вся́ких ско́рбех, печа́лех и напа́стех усе́рдно прося́щия. О Всеми́лостивая Де́во, Богоро́дице чи́стая! Бу́ди о нас Хода́таица к Сы́ну Твоему́ Христу́ Бо́гу на́шему. Мы бо, гре́шнии, не и́мамы ины́я по́мощи ра́зве Тебе́, Влады́чице. Ты еси́ на́ше упова́ние, Ты засту́пница на́ша и предста́тельница, Ты оби́димым защище́ние, скорбя́щим радование, си́рым прибе́жище, вдова́м храни́тельница, де́вам сла́ва, слезя́щим весе́лие, больны́м посеще́ние, немощны́м исцеле́ние, гре́шным спасе́ние. Сего́ ра́ди, о Богома́ти, к Тебе́ прибега́ем, и на Твой о́браз взира́ем, и с любо́вию покланя́́емся, моле́бное пе́ние принося́ще и вопию́ще: поми́луй нас, Ма́ти Бо́жия, и проше́ния на́ша испо́лни, вся бо суть возмо́жна хода́тайству Твоему́ пред Бо́гом, Ему́же подоба́ет вся́кая сла́ва, честь и поклоне́ние, ны́не и при́сно и во ве́ки веко́в. Ами́нь.
Икона Божией Матери «Неувядаемый Цвет» Лукиановой пустыни.
День празднования: 3 (16) апреля.
Тропарь, глас 5.
Ра́дуйся, Богоневе́сто, же́зле та́йный, Цвет Неувяда́емый процве́тший, радуйся, Влады́чице, ю́же ра́дости наполня́емся и жизнь насле́дствуем.
Кондак, глас 6.
Не и́мамы ины́я по́мощи, не и́мамы ины́я наде́жды, ра́зве Тебе́, Влады́чице: Ты нам помози́, на Тебе́ наде́емся, и Тобо́ю хва́лимся: Твои́ бо есмы́ раби́, да не посты́димся.
Молитва.
О, Всеми́лостивая Госпоже́, Цари́це Богоро́дице! От всех родо́в избра́нная и все́ми ро́ды небе́сными и земны́ми ублажа́емая! Смире́нно мо́лимся Тебе́: воззри́ ми́лостивно на предстоя́щия пред свято́й и чудотво́рною ико́ною Твое́ю лю́ди сия́, я́ко Тебе́ Само́й ту су́щей, и прии́ми моли́твы и пе́ние, со умиле́нием Тебе́ ны́не приноси́мыя от недосто́йных раб Твои́х, и пода́ждь с ве́рою прося́щим по коему́ждо проше́нию исполне́ние. Ты, Неувяда́емый Цве́те чистоты, пода́ждь нам по́мощь, плотско́ю стра́стию обурева́емым, и сердца́ на́ша уцелому́дри. Ты, боголюби́вая Скоропослу́шнице, услы́ши в час сей моли́тву на́шу. Ты, Засту́пнице усе́рдная, Ма́ти Го́спода Вы́шняго и на́ша Ма́ти и Наде́ждо, облегчи́ ско́рбь на́шу: немощны́м здра́вие да́руй, разсла́бленныя и неду́жныя исцели́ и от одра́ боле́зни возста́ви, прокаже́нныя очи́сти, слепы́м зре́ние да́руй, бе́сныя от бесо́в свободи́, оби́димыя от оби́д изба́ви, скорбя́щим утеше́ние низпосли́, вдови́цы и си́рыя защити́, гре́шныя к покая́нию призови́ и на путь спасе́ния напра́ви, ка́ющимся проще́ние да́руй, ста́рость поддержи́, ю́ныя наста́ви, ма́лыя де́ти сохрани́, в доме́х мир и дружелю́бие утверди́, путеше́ствующим спутеше́ствуй, в моря́х пла́вающим бу́ди до́брая Ко́рмчая и благоти́шие да́руй, ереси и раско́лы искорени́, отпа́дшия от благочести́выя ве́ры на путь пра́вый обрати́, страну́ на́шу ми́ром огради́. Всех же нас от внеза́пныя сме́рти сохрани́, земли́ благопло́дие и вся́кое душе́вному на́шему и теле́сному здра́вию и спасе́нию поле́зное да́руй, вся бо хода́тайством к Сыну Твоему́, Христу́ Бо́гу на́шему, мо́жеши. О всепе́тая Ма́ти, Пресвята́я Де́во Богоро́дице! Не преста́й моли́тися о нас, недосто́йных, ко пречи́стому о́бразу Твоему́ со умиле́нием припа́дающих и со стра́хом и любо́вию на сей взир́ающих. Услы́ши нас, Влады́чице, на Тя по Бо́зе еди́ну наде́жду иму́щих. Пре́жде же отше́дшия отцы и ма́тери, бра́тию и се́стры на́ша упоко́й в селе́ниях святы́х, в ме́сте зла́чне, в ме́сте поко́йне, иде́же несть печа́ль и воздыха́ние. Егда́ же приспе́ет и на́ше от жития́ сего́ отше́ствие и к ве́чной жи́зни преселе́ние, предста́ни нам, Преблагослове́нная наде́жда на́ша, и да́руй нам христиа́нскую кон́чину безболе́знену, непосты́дну, ми́рну и Святы́х Тайн прича́стну, да и в бу́дущем ве́це сподо́бимся вси, ку́пно со все́ми святы́ми, безконе́чныя блаже́нныя жи́зни во Ца́рствии возлю́бленнаго Сы́на Твоего́, Го́спода на́шего Иису́са Христа́, Ему́же подоба́ет вся́кая сла́ва, честь и поклоне́ние, со Безнач́альным Его Отце́м, и Пресвяты́м и Благи́м и Животворя́щим Его Ду́хом, ныне и при́сно и во ве́ки веко́в. Ами́нь.
Икона Божией Матери «Игумения горы Афонской» Лукиановой пустыни.
День празднования: 13 (26) ноября.
Тропарь, глас 1.
Пребла́гая Влады́чице, Пресвята́я Де́во Богоро́дице Мари́е! Приими́ моле́ние недосто́йных раб твои́х и моли́ Сы́на Твоего́, Христа́ Бо́га на́шего, пода́ти нам оставле́ние прегреше́ний и ми́рови мир и спасе́ние. Ты бо еси́ святы́м оби́телем покро́в и Засту́пница ро́да Христиа́нскаго.
Кондак, глас 3.
В дому́ Твое́м, Пречи́стая Де́во Богоро́дице Мари́е, избра́нныя Тобою оби́тели, умно Тебе в о́бразе и́ноческом ви́дяще, к Тебе́ припа́даем и мо́лимся: покры́й, защити́ и спаси́ на Тя упова́ющия.
Молитва.
О Еди́на Пречи́стая и Пресвята́я Влады́чице Богоро́дице, пала́то Ду́ха Свята́го, всемогу́щая Засту́пнице и Хода́таице ро́да христиа́нскаго! Не отри́ни мене́ недосто́йнаго, грехми́ ду́шу и те́ло оскверни́вшаго, очи́сти ум мой от помышле́ний су́етных, углеба́ющих в па́губе ми́ра сего́ преле́стнаго. Укроти́ моя́ стра́сти и изба́ви мя от грех моих. Пода́ждь же бо́дрость и рассужде́ние уму́ моему́ помраче́нному, да за́поведей Бо́жиих де́латель иску́сен явлю́ся. Огне́м любве́ Боже́ственныя воспламени́ оледене́вшее се́рдце мое́. Па́че же Тя молю́, Блага́я Ма́ти, я́коже Макси́му Кавсокаливи́ту, испроси́ и мне непреста́нныя моли́твы дарова́ние, да пребу́дет сия́ во мне пото́ком, от зно́я страсте́й и скорбе́й находя́щих, прохлажда́ющим и наполня́ющим, да стяжа́в мир серде́чный по́мощию Твое́ю и очи́стився от скверн грехо́вных покая́нием сле́зным, сподо́блюся в бу́дущем ве́це ра́дости и блаже́нства прича́стник бы́ти всех преподо́бных оте́ц Афо́нских и всех святы́х от ве́ка Бо́гу благоугоди́вших. Ами́нь.
Приложения:
Служба иконе Божией Матери «Игумения» ноября в день 13-й.
Акафист Пресвятой Богородице пред иконой «Экономисса» («Игумения горы Афонской»)
